Со финансиска инјекција до 4 милијарди евра, француската држава стана најголемиот единствен акционер во „Air France-KLM“, која беше уништена од кризата предизвикана од Ковид-19. По договорот со Европската комисија за јавна помош, уделот на Франција треба да се зголеми на скоро 30 проценти, изјави министерот за финансии Бруно Ле Мер.
На овој начин, државата застана зад компанијата и бројните работни места во Франција. Во замена за помошта, владата се согласи со ЕК дека авиокомпанијата ќе предаде околу четири проценти од правата за полетување и слетување на аеродромот „Орли“ во Париз.
Пред договорот за новиот финансиски пакет, Франција и Холандија поседуваа по околу 15 проценти од „Air France-KLM“. За разлика од Франција, Холандија не сака да учествува во зголемувањето на капиталот – затоа нивното сегашно учество е намалено.
Долго очекуваниот финансиски пакет го означува првичниот резултат на повеќемесечните преговори меѓу „Air France-KLM“, нејзините најголеми акционери – Франција и Холандија – и Европската комисија. Ова исто така се случува наспроти позадината на ескалацијата на вирусот низ целиот регион, што наложи продолжување на ограничувањата во Франција и ја принуди Велика Британија да отстапи од целта за намалување на мерките на 17-ти мај, кога требаше повторно да се отвори за странски патувања.
Владите се вовлечени во полемики по спојувањето на „Air France“ и „KLM“ во 2004-та година, додека ЕУ повика на услови за да се надмине загриженоста за монопол.
Акциите на „Air France-KLM“ паднаа за 1,5% на 5,06 евра. Тие изгубија околу 2,2 проценти од нивната вредност во оваа година.
Како дел од кризата со коронавирусот, што доведе до драстичен пад на воздушниот сообраќај, многу земји повторно добија поголем удел во нивните авиокомпании, кои беа приватизирани во минатото за да се спасат од банкрот и загубата на работни места. На пример, германскиот државен фонд за спасување „WSF“ поседува нешто повеќе од 20 проценти од акциите на „Lufthansa“.
