Сопственикот на „British Airways“, „IAG“ ја зголеми вкупната ликвидност за 2,45 милијарди британски фунти (3,4 милијарди долари) преку заем и одложени придонеси за пензија, објави „Reuters“.
Групата продолжува да истражува други опции за долгот за да ги подобри своите финансии, додаде новинската агенција.
Во замена за одложување на придонесите за пензија, „British Airways“ постигна договор да не исплаќа дивиденда на матичната компанија „IAG“ пред крајот на 2023-та година.
Како и сите авијациски и транспортни компании, „IAG“ губи готовина по скоро 12-месечен период со минимални приходи. Компанијата ја откажа дивидендата во април минатата година, а потоа собра 2,74 милијарди евра од акционерите во октомври за да преживее.
Земјите ширум светот ги заострија ограничувањата за патувања во последните два месеци како одговор на новите варијанти на коронавирусот и не е јасно кога ќе се рестартира патувањето. Ова врши дополнителен притисок врз финансиите на авиокомпаниите.
„Покрај овие аранжмани, „IAG“ продолжува да истражува други иницијативи за долговите за понатамошно подобрување на нејзината ликвидност“, се вели во соопштението на „IAG“, кој исто така е сопственик на „Iberia“ и „Vueling“ во Шпанија и ирскиот „Aer Lingus“.
„British Airways“ соопшти дека постигнал конечен договор за нов 5-годишен заем од 2 милијарди фунти, што делумно го гарантира Велика Британија преку одделот за финансирање на извозот. Овој договор исто така го ограничува превозникот да плаќа дивиденда на „IAG“.
„British Airways“ е најголемата и најпрофитабилна авиокомпанија на „IAG“, а паузата за дивиденда значи дека може да поминат години пред акционерите на групацијата повторно да добијат исплати. Ова тешко дека ќе биде изненадување за акционерите со оглед на новите долгови на авиокомпанијата и фактот дека патувањата не се очекува да ги достигнат нивоата од 2019-та до 2024-та година.
Коментари