Јужнокорејската технолошка групација „Samsung Electronics“ има намера да инвестира 17 милијарди долари за изградба на фабрика за чипови во Аризона, Тексас или Њујорк.
„Samsung“ истражува две области во и околу Феникс, две локации во и во близина на Остин и голем индустриски кампус во округот Џенесис во западен Њујорк.
Важен фактор за тоа дали „Samsung“ ќе оди напред со плановите ќе биде достапноста на стимулации од американската влада за да ги компензира стимулациите што ги нудат странските земји и поевтините трошоци во другите делови на светот, рече лице запознато со ова прашање.
Предлогот доаѓа во време кога Соединетите држави се обидуваат да одвојат милијарди долари финансирање за да го зголемат производството на чипови во земјата и да ја намалат зависноста од Тајван, Кина и Јужна Кореја. Новите стимулации за производство на чипови се вклучени во Законот за дозволи за национална одбрана, донесен во јануари, иако мерките сè уште не добиле финансирање.
Предложената фабрика на „Samsung“ ќе вработи до 1.900 лица и се очекува да профункционира до октомври 2022-ра година, според преписката разгледана од „The Wall Street Journal“ помеѓу властите на „Samsung“ и Гудјер во Аризона, едно од местата што компанијата ги разгледува. Како што е вообичаено за големите индустриски проекти, локалните власти нудат голем број на стимулации, вклучувајќи даночни олеснувања и подобрувања во инфраструктурата, за привлекување на фабриката, се вели во писмото.
Историски гледано, САД не понудија федерална помош за фабриките за чипови. Но, пандемијата на коронавирусот истакна како нарушувањата во глобалниот синџир на снабдување можат да го запрат протокот на клучни производи потребни за создавање на витални технологии, од 5G паметни телефони до авиони, и предизвикаа интерес на САД да станат посамостојни.
Со растот на индустријата за чипови во Азија во последните децении, американскиот удел во производството на чипови на глобално ниво падна на околу 12%, се вели во извештајот на „Boston Consulting Group“ од минатата година. Според аналитичарот на компанијата, ќе биде потребна значителна нова финансиска помош за земјата да го сврти трендот. Од „Samsung“ не коментираа во врска со оваа тема.
„Samsung“ има капацитети за производство на чипови во Остин уште од 90-тите години на минатиот век и се шири таму со текот на годините. Компанијата минатата година купи дополнително земјиште во близина на постојните објекти, покажуваат локалните регистри на имот. Следната недела, таа сака локалните власти да го поместат патот во близина на овие објекти, според агендата на општинскиот совет. Дискусиите за стимулациите за проектот се најдоа на агендата на властите во Остин и блискиот град Тејлор.
Претставници на локалната самоуправа во Тексас, Аризона и Њујорк или одбија да коментираат или не одговорија на барањата за коментар.
Бранот планови за нови фабрики за чипови во САД дополнително ги комплицира промените што се случуваат во индустријата како целина.
