Американската компанија „Reddit“ ја купи апликацијата за кратки видеа „Dubsmash“, влегувајќи во пазар во кој доминира кинескиот гигант „TikTok“, пишува „CNBC“.
Финансиските услови на трансакцијата, кои вклучуваат готовина и акции, не се обелоденети.
Американската социјална мрежа е најпозната по своите форуми преку Интернет, во кои корисниците објавуваат текстови, линкови и друга содржина поврзана со одредени интереси. Во текот на изминатите неколку години, „Reddit“ се обидуваше да ги освежи своите услуги. Го смени дизајнот на својата веб-страница за да остане во чекор со новите трендови наметнати од популарните платформи, како што се „Facebook“ и „Twitter“.
Сега, кога видео-апликациите добиваат популарност, особено кај помладите корисници, „Reddit“ се обидува да го прошири своето присуство во оваа брзорастечка категорија.
Во објава на блог, „Reddit“ наведува дека „Dubsmash“ ќе ја задржи сопствената платформа и бренд, и покрај фактот дека „Reddit“ ќе ги интегрира алатките за развој на видео, развиени од апликацијата.
Основана во Германија во 2014-та година, „Dubsmash“ има платформа што им овозможува на корисниците да снимаат видеа што се комбинираат со звук на песни, филмови и ТВ-емисии, исто како во „TikTok“.
„Reddit“ посочува дека „Dubsmash“ е „платформа што ги поздравува креаторите на содржини и корисниците кои се помалку застапени на социјалните мрежи“. Апликацијата ја користат околу 25 проценти од афроамериканските тинејџери во САД, според „Reddit“, а жените сочинуваат околу 70 проценти од потрошувачката база.
