Јужнокорејската технолошка компанија „LG Corp.“ објави дека нејзиниот одбор одлучи да го преструктуира конгломератот „LG Group“ со разделување на некои нејзини единици, како што е производителот на дисплеј чипови „Silicon Works“, за да формира нов конгломерат следната година, пренесува „Reuters“.
Ова е уште една серија зделки и реконструкции од семејни конгломерати, бидејќи тие продолжуваат да растат и да се пренесуваат од генерација на генерација. Реорганизацијата може да помогне во надминување на регулаторниот притисок за ограничување на трансакциите во рамките на групите во семејни конгломерати.
Ку Бон-џун ќе биде извршен директор на новата холдинг-компанија, според документите на „LG Corp.“ доставени до регулаторите. Управата со овие подружници ќе ја преземе неговиот внук, кој ја презеде претседателската функција во групацијата „LG“ во 2018-та година, откако почина неговиот татко.
„LG Group“ е четврти по големина јужнокорејски конгломерат и неговата основна дејност вклучува потрошувачка електроника, хемикалии, производи за домаќинството и козметика, како и компоненти како што се батерии и дисплеи што ги користат производите на „GM“, „Tesla“ и „Apple“.
Единиците, кои ќе бидат поделени во мај 2021-ва година, ги вклучуваат „LG International Corp“, „LG Hausys“ и „LG MMA Corp“, откриваат документите до регулаторите.
Промените во организацијата вклучуваат и поделба на ненаведената „Pantos Logistics“. Логистичката единица генерира 64% од своите приходи за 2019-та година од други подружници на групацијата „LG“, вклучувајќи ги и „LG Electronics“ и „LG Chem“, според нејзините документи.