„Tiffany & Co.“, која беше купена од францускиот гигант за луксузни производи „LVMH“, ги надмина очекувањата на Волстрит за кварталната добивка. Американскиот производител на накит добива благодарение на растот од 70% на продажбата во Кина и обновувањето на побарувачката на неговиот домашен пазар, пренесува „Reuters“.
Резултатите навестуваат добра празнична сезона за компанијата и другите луксузни трговци кои се тешко погодени од пандемијата. Тие исто така ја нагласуваат зголемената важност на продажбата во Кина за да се неутрализира зависноста од туризамот, особено од кинеските туристи, кои порано активно купуваа во модните центри, како Милано и Париз.
„Имавме силен трет квартал … што зборува за посебната јачина на брендот „Tiffany“ и ни дава самодоверба кога влегуваме во важната сезона на празници“, рече извршниот директор Алесандро Болиоло, кој предложи „успешно завршување на спојувањето со „LVMH“ во почетокот на 2021-ва година“.
Од „Tiffany“ велат дека нејзината продажба во азиско-пацифичкиот регион пораснала за 30 проценти, додека оние во Северна и Јужна Америка се намалиле за 16 проценти (значително помалку од падот од 46 проценти од претходниот квартал).
Компанијата предвидува низок и среден едноцифрен пад на приходите за празничниот квартал, додека аналитичарите проценуваат дека ќе биде околу 3%. Покрај тоа, се очекува високо едноцифрено процентно зголемување на профитот за тековниот квартал.
Здравствената криза ја принуди компанијата со седиште во Њујорк да инвестира во својот бизнис преку Интернет и да воведе услуга за собирање нарачки од одредени продавници. Ова и помогна на нејзината продажба преку Интернет да скокне за 92% во кварталот.
Со исклучок на некои ставки, „Tiffany“ заработи 1,11 долари по акција, што е далеку над просечната прогноза од 66 центи по акција.
Нето приходите од продажба на компанијата паднаа за околу 1% до 1,01 милијарди долари во третиот квартал, кој заврши на 31-ви октомври, но е над просечната прогноза од 980,71 милиони долари, според „Refinitiv“.
