За албанската влада е неприфатливо српската компанија „Телеком Србија“ да стане сопственик на „Телеком Албанија“ поради можни политички реакции, објави албанската телевизија „Топ канал“.
Официјалните владини извори потврдуваат дека високи претставници на српската компанија се состанаа со претставници на албанското Министерство за транспорт во Тирана.
На овој состанок на претставниците на „Телеком Србија” им е кажано дека нивното присуство на албанскиот пазар може да создаде проблеми како резултат на можни реакции од политичка природа, иако српските инвестиции се важни за Албанија.
„Телеком Србија”, имено, понудил 60 милиони евра, што се смета за најдобра понуда. Деталните информации ќе бидат објавени дополнително, а во тек е разгледувањето на понудата на „Телеком Србија“.
Албанските медиуми велат дека во конкуренција, покрај „Телеком Србија“, се и две бугарски компании.
„Телеком Албанија“ е втор најголем оператор во Албанија и е во сопственост на „Дојче телеком“.
