Трошоците за реструктуирање го намалија профитот на LafargeHolcim

Најголемиот производител на цемент во светот „LafargeHolcim“ објави дека во првото полугодие профит забележал пад од 43% по трошоците за реструктуирање од 300 милиони франци, објави „Ројтерс“.

Компанијата со седиште во Цирих соопшти дека нејзината нето-добивка во првата половина од годинава се намалила на 371 милиони франци (373,24 милијарди долари) од 651 милиони франци од пред една година.

Продажбата се зголеми за 2,7% на 13,27 милијарди франци, а компанијата ја потврди својата цел за годишен раст на нето-продажбата од 3 до 5% и зголемување на оперативната добивка од најмалку 5%.

Под водство на главниот извршен директор Јан Јениш, кој ја презеде функцијата минатиот септември, компанијата ги намалува трошоците, објавувајќи претходно оваа година дека ќе ги затвори водечките канцеларии во Цирих и Париз и ќе скрати 200 работни места, обидувајќи се да спаси 400 милиони франци годишно до крајот на првиот квартал од 2019-та година.

Најголем дел од работата за реструктуирање е завршена, рече главниот финансиски директор, Жералдин Пико, иако одби да коментира колку работни места генерално беа намалени како дел од програмата.

„LafargeHolcim“, формирана во 2015-та година по спојувањето помеѓу францускиот „Lafarge“ и швајцарскиот „Holcim“, има за цел побрз раст, концентрирајќи се на помали пазари и помали аквизиции.

Јениш рече дека е задоволен од растот на продажбата, особено со забрзувањето во вториот квартал, кога продажбата се зголеми за 5% од 2,7% во првите три месеци од годината.

„Оперативните проблеми на некои пазари се решени и очекуваме да видиме пораст на маргините што го зафаќаат нагорниот тренд на побарувачката во втората половина од 2018-та година“, рече тој.

Резултатите на „LafargeHolcim“ се поддржани од силниот раст во Индија – еден од најголемите пазари на компанијата каде нејзината подружница „Ambuja Cement“ оваа недела објави раст од 27% на профитот во вториот квартал.

Меѓутоа, загубите во Африка се влошуваат, при што регионалната поделба објави загуба претходно оваа недела поради зголемените финансиски трошоци и загубите од извозот од Јужна Африка.