Техничкиот гигант „Microsoft“ потврди дека ќе го купи „GitHub“ за 7,5 милијарди долари. Онлајн платформата за развој на софтвер има 24 милиони корисници, пишува „Business Insider“.
Договорот се очекува да добие одобрение од надлежните органи до крајот на 2018-та година. „GitHub“ за последно обезбеди капитал од 350 милиони долари во 2015-та година при оценка од 2 милијарди долари.
Компанијата основана во 2008-ма година ќе биде купена за 7,5 милијарди долари, која ќе се плати во акции на „Microsoft“.
Актуелниот потпретседател на „Microsoft“, Нејт Фридмен, ќе ја преземе функцијата главен извршен директор на „GitHub“. Тој ќе го замени Крис Ванстрат, кој пред 10 месеци изјави дека има намера да се повлече, но продолжи да ги извршува своите должности.
„GitHub“ е клучна алатка за програмерите низ целиот свет. Се користи за зачувување на кодот со кој ги развиваат нивните софтверски проекти.
По трансакцијата, „GitHub“ ќе стане дел од „Intelligent Cloud“ на „Microsoft“.
Акциите на „Microsoft“ вчера беа затворени по цена од 101,67 долари по акција, а пазарната вредност на компанијата достигна 781 милијарда долари.
