Глобалната продажба на уметнички дела бележи пад од 11% во 2016-та година главно поради забавувањето на економскиот раст и политичката несигурност, покажува објавениот извештај, цитиран од агенциите.
САД останува најголемиот пазар на уметност, пред Велика Британија и Кина, според првиот „Извештај за светскиот пазар на уметноста“ на меѓународниот саем на уметноста „Арт Базел“ и швајцарската финансиска компанија „UBS“.
„Економскиот раст и континуираната политичка несигурност во глобалната економија го погодија пазарот во 2016-та година и се причина за претпазливост на оние кои купуваат и продаваат во некои области“, се истакнува во извештајот.
Светскиот пазар на уметнички дела предвиде заедничка продажба во вредност од 56,6 милијарди долари за 2016-та година, што е помалку од 63,3 милијарди долари, една година порано.
„Приходите биле поткопани од послабата продажба на скапи дела, особено на пазарот за ликовни уметности, кои беа во основата на растот во 2014-та година“, се наведува во документот.
САД, Велика Британија и Кина ги „зацврстија“ водечките позиции, а заедно покриваат 81% од вредноста на глобалната продажба на предмети од уметноста.
Иако САД го задржат првото место, уделот на земјата се намалил од 43 на 40%. Во извештајот се наведува дека, сепак, тоа се гледа како враќање кон нормалните нивоа по брзиот раст во претходните години.
Уделот на Велика Британија останува без промена – 21%, а уделот на Кина се зголеми од 19 на 20 отсто во минатата година. Кина е на чело кај тендерите со удел од 34% од вредноста на продажбата.
