Пред една недела во Санкт Петербург се случи настан кој е во состојба да го промени значително енергетскиот пазар во Европа, пишува во својата анализа руското издание „ИноСМИ“. Станува збор за средбата меѓу претседателот на Русија Владимир Путин и неговиот турски колега Реџеп Таип Ердоган.
За време на разговорите двајцата се договорија за рестартирање на голем број проекти, меѓу кои се гасоводот „Турски поток“.
Сепак закана ли е „Турски поток“ за плановите на Азербејџан да испорачува природен гас во Европа? По гасоводот ќе потече руски гас првично кон Турција, а потоа и за Јужна Европа. Односно тоа е пазарот на кој се стреми и Азербејџан со спроведувањето на плановите за Јужниот гасен коридор.
Според анализите се уште е рано Баку да се грижи од руската конкуренција. Во прво време Јужниот гасен коридор го градат веќе „TANAP“ и „TAP“, имаат силен „благослов“ од Брисел. Уште од самиот почеток Европската комисија беше критички настроена кон „Јужен поток“, а расположението кон неговиот наследник – „Турски поток“, не се подобри.
Самиот Путин изјави дека Москва ќе има потреба од многу сериозни гаранции од ЕУ, пред да бидат спроведени какви било планови за испорака на гас – дали преку „Јужен поток“, дали преку „Турски поток“.
Рускиот министер за енергија Александар Новак ја елаборираше тезата на рускиот претседател и изјави по средбата во Санкт Петербург дека првата цевка на „Турски поток“ ќе биде изградена многу брзо – до 2019-та година. Во неа ќе биде испорачан руски гас наменет за турскиот пазар. Во втората цевка треба да пристигнува суровина, која Анкара ќе ја транзитира преку гасен центар на грчко-турската граница кон Европа. Новак е категоричен – за неа се уште е рано да се зборува.
Во енергетските средини „Јужен поток“, „Турски поток“ и „TAP“ се конкуренти – успехот на руските гасоводи го ставаат под сомнение европските шанси за азербејџанскиот гас, и обратно, пишува уште „ИноСМИ“. Според анализата сепак шансите се на страната на Баку, особено со оглед на желбата на ЕУ да ја намали зависноста од рускиот гас.
