Официјално заврши производството на најлуксузниот модел на „Volkswagen“. Последниот примерок од лимузината „Phaeton“ слезе од производната лента од фабриката во Дрезден, чии хали ќе бидат пренаменети во изложбен центар.
Од официјалното соопштение на „Volkswagen“, станува јасно дека последниот произведен „Phaeton“ е со црна боја, има 4,2-литарски „V8“ мотор со 335 КС и „4MOTION“ погон.
Тој најверојатно ќе биде паркиран заедно до првиот „Phaeton“, кој се појавил пред 14 години како дел од стратегијата на „VW“ да влезе на пазарот на луксузни автомобили.
Се уште не е јасно дали „Phaeton“ ќе има наследник. Развојот на следната генерација започна пред неколку години, но беше замрзнат поради неочекуваните трошоци околу скандалот „Дизелгејт“. Потоа се проговори за претворање на лимузината во луксузен електромобил, но во моментот нема официјални информации за подготвување на сличен модел.
Најлуксузна лимузина во оваа палета на „Volkswagen“ е „Phideon“. Овој модел дебитираше пред еден месец во Женева, но е наменет целосно за кинескиот пазар.
Што се однесува до фабриката во Дрезден, таа ќе биде затворена и обновена во изложбен центар за најновите технологии на концернот. Официјалното отворање е закажано за почетокот на април оваа година. Персоналот ќе биде преместен во фабриката во Цвикау и во други објекти на производителот, се вели во пораката.
Во подоцнежна фаза производството во Дрезден треба да биде обновено, но во моментот не се објавени никакви детали.
