За време на автомобилскиот саем во Детроит, Хенрик Фискер, основач на новата автомобилска компанија „VLF Automotive“, покажа нов концепт на суперавтомобил.
Името на новата компанија доаѓа од трите имиња на неговите основачи – Гилберт Вилареал од „Boeing“, Боб Луц – поранешниот шеф на „GM“, и „F“ природно од Фискер. Според плановите на новата компанија, таа ќе ги продава старите модели „Karma“ опремени со мотор на „Corvette“ и цена од над 200.000 долари, заедно со новопредставениот модел.
Новиот суперавтомобил ќе се нарекува „Force 1“ и е базиран на „Dodge Viper“. За изработката на патничката кабина се користат лесни материјали, а моторот е 8.4-литарски V10 со моќност од 745 коњски сили.
Благодарение на неговата тежина од само 1538 килограми, „Force 1“ ќе може да забрзува од 0 до 100 км/ч за 3 секунди, додека максималната брзина му е ограничена на 350 км/ч. За постигнување на брзината од 220 км/ч му се потребни 10.97 секунди.
Од суперавтомобилот ќе бидат произведени само 50 примероци, а цената на секој од нив ќе е 268.500 долари.