Компанијата „Qoros“, основана од бизнисмени од Кина и Израел, доби популарност по појавата на нејзиниот прв модел – седанот „Qoros3“. Подоцна тој стана хечбек, а на саемот во Женева се појави кросовер верзија на моделот, кој ќе се продава и во Европа.
Всушност во Кина предметниот кросовер беше прикажан уште во ноември минатата година, но сега постои и негова верзија за Стариот континент.
Општо земено „Qoros 3 City SUV“ во голема мера личи на хечбекот со истото име, но разликите се во зголемувањето на тлото и пластичните заштитни лајсни. Освен тоа европската модификација е со различен заден браник и со модернизиран издувен систем.
Што се однесува до ентериерот, тој целосно се повторува од оној на хечбекот „Qoros 3“. Во листата на дополнителна опрема на „SUV“-моделот се вклучени ксенон фарови, кожен седишта, клима уред, мултимедијален систем со екран на допир, како и камера за рикверц.
Очекувањата беа кросоверот да добие два мотори за Европа, но во крајна линија неговите творци одлучија да биде само еден. Моделот ќе се нуди со 1.6-литарски бензински мотор со моќност од 154 КС, а тој може да се комбинира и со 6-брзински мануелен менувач, но и со автоматска трансмисија со две спојки.
Од 0 до 100 км/ч „Qoros 3 City SUV“ забрзува за 10,1 секунди, а верзија со рачен менувач има просечна потрошувачка од 6,8 л/100 км.
Засега од компанијата „Qoros“ не ја објавија цената на моделот. Се очекува, сепак моделот да биде опипливо подостапен од „Volvo V40 Cross Country“ и „Mercedes-Benz GLA“, со кои ќе се натпреваруваат на пазарот.
