„Mozilla“ има склучено долгорочно партнерство со „Yahoo“, според кој пребарувачот стандардно во прелистувачот „Firefox“ ќе биде оној на интернет порталот. Промената влијае на корисниците во САД, посочуваат од „Mozilla“.
Веќе следниот месец ќе биде пуштена ажурирана верзија на „Firefox“ во САД, во која наместо „Google“ пребарувачот, стандардно ќе е „Yahoo“. Паралелно со ова „Yahoo“ ќе понуди дополнителни услуги за „Firefox“, велат од компанијата.
Според извршниот директор на „Mozilla“, Крис Бирд одлуката не е поради подобрите финансиски услови на „Yahoo“, туку поради долгорочната стратегија. Партнерството со „Yahoo“ е за следните пет години.
Во меѓувреме промена во стандардниот пребарувач на „Firefox“ ќе има и во Русија. Таму наместо „Google“ ќе се најде неговиот руски конкурент „Yandex“. Засега „Google“ останува главниот пребарувач за корисниците во Европа. Во Кина, пак, е „Baidu“.
Според извршниот директор на „Yahoo“, Мариса Мајер договорот со „Mozilla“ ќе му помогне на интернет порталот да го зголеми својот удел во онлајн пребарувањето. Главната цел на „Yahoo“ во случајот да го прекине падот и да почне да се зголемува присуството во сегментот.
