Словенечкиот министер за надворешни работи Карл Ерјавец потврди дека ќе се сретне во Брисел со шефот на хрватската дипломатија Весна Пусиќ за да разговара за изнаоѓање компромисно решение во врска со „Љубљанска банка“.
– Можно е да се најде решение и словенечкиот Парламент да го ратификува договорот за членство на Хрватска во ЕУ, истакна Ерјавец.
Тој повтори дека Словенија не може да го ратификува договорот за Хрватска доколку процесите покренати пред хрватските судови против затворената словенечка банка не бидат прекинати. Во спротивно финансиските последици можат да бидат тешки за Словенија, бидејќи таа ќе треба да плати обештетувања за девизните заштеди меѓу 800 милиони и три милијарди евра, зависно од каматите.
Ерјавец нагласи дека прашањето за девизните заштеди е прашање поврзано со наследството на поранешна Југославија, додавајќи дека е можен компромис со Хрватска.
При распадот на поранешна Југославија околу 430.000 Хрвати имале депозити во словенечката „Љубљанска банка“, која банкротира во 90-тите години. Веднаш потоа Хрватска обештети две третини од штедачите во вредност од околу 270 милиони евра, па сега бара Словенија да и ја врати оваа сума.
