Германскиот производител „Audi“ за време на автосаемот во Женева на почетокот на март ќе ја покаже спортската верзија на кросоверот „Q5“. Ова го објави шефот на единицата „Audi Sport“ – Стефан Винкелман, за изданието „Motoring“.
Топ-менаџерот откри дека плановите на „Audi Sport“ предвидуваат претставување на вкупно 8 нови „RS“-модели. Првиот од нив ќе биде токму „RS Q5“, кој ќе се придружи на предложените „RS3“, „RS Q3“, „TT RS“, „RS6“, „RS7“ и „R8“. Винкелман не откри технички детали за кросовер, но тоа го направи извор на весникот, запознаен со плановите на „Audi“.
Моќниот „Audi Q5“ ќе се потпира на 2.9-литарски V6 мотор развиен од „Porsche“. Овој агрегат се појави кај новата генерација на „Panamera“, а ќе се поставува и на идните „RS4“ и „RS5“. Кај нив моќноста му е од 450 КС и 600 Нм, па се очекува и „RS Q5“ да има слични параметри.
Во моментов најмоќната верзија на овој модел на „Audi“ е „SQ5“ (на фотографијата). Таа располага со 3.0-литарски V6 со моќност од 354 КС и 500 Нм. Кај неа забрзувањето од 0 до 100 км/ч трае 5,4 секунди, се очекува кај „RS Q5“ времето да падне под 5 секунди. Максималната брзина ќе остане ограничена на 250 км/ч.
