„Asus“ влегува во сферата на роботиката. Компанијата го претстави својот прв робот кој ќе има улога на домашен помошник. „Zenbo“ може да помага во управувањето со паметните домови и во грижата за деца и возрасни луѓе.
Роботот ќе чини 599 долари, а ќе може сам да се движи низ домот. Тој може да се управува и преку гласовни команди.
„Zenbo“ ќе ги потсетува на луѓето дека е време да ги испијат лековите, да не заборават за треминот кај лекар или да направат гимнастиката. Тој ќе може да ги анализира и активностите на човек. На пример, ако возрасен човек падне на земјата, роботот веднаш ќе се јави на блиските и ќе им ги покаже случувањата преку вградена камера.
Роботот може да биде и практичен домашен асистент за паметните домови. Тој може да се поврзе со осветлувањето, камерите и друго. Може да помага и во готвењето, да чита рецепти, и да си игра со децата со неколку различни игри, како и да се користи за видео повик или слушање музика.
„Asus“ пушти и софтверска платформа, која ќе им овозможи на програмерите да создадат дополнителни функции и апликации за „Zenbo“. Лицето на робот е всушност екран на допир, па така што може да се управува и преку него. „Asus“ не објави кога „Zenbo“ ќе започне да се продава.