Отворање автокампови во секоја општина, мапирање 200 планинарски патеки и уште толку стази за планински велосипедизам, како и изградба на нови планинарски домови, се само некои од владините проекти што треба да ја остварат планираната проекција – двоцифрен раст на туризмот.
Како што рече денеска Директорот на Агенцијата за поддршка и промоција на туризмот Јордан Трајков, сето ова ќе овозможи нов туристички производ што ќе привлече поинаква категорија туристи, кампери, кои досега речиси воопшто не доаѓаа во Македонија.
– Се работи и на иницијативата за донесување закон со кој, покрај планинарските патеки и планинарските домови, ќе бидат опфатени и планинарските водичи, струка која кај нас е се уште дефицитарна, истакна Трајков.
За проектот планинарски патеки веќе се обезбедени 25 милиони денари од Програмата за рурален развој. За автокамповите, пак, се дeфинирани шест локации на државно земјиште.
Според Трајков, минатата година се остварија предвидувањата за двоцифрен раст на бројот туристи споредено со 2011-та. И за оваа, 2013-та, се очекуваат исти резултати.
– Тоа е забележителен успех ако се знае дека растот на туризмот во светски рамки е под три отсто, а Македонија е далеку над тој раст, подвлече директорот на Агенцијата.
