Две победи на гостинските екипи во седумте одиграни натпревари во НБА. Голден Стејт предводен од Кари ја продолжи победничката серија, Вајтсајд забележа „трипл дабл“ во поразот на Мајами, а крилниот играч на Њујорк Порзигинс, кој ја игра руки сезоната, постигна рекордни 29 поени во кариерата.
Шампионите од Оукленд и по 12 натпревари немаат пораз во лигата, предводени од Кари (37 поени, 9 асистенции), славеа над Торонто со 115:110. Тренерот на Голден Стејт, Стив Кер, овој меч го играше со десет играчи и сите се запишаа меѓу стрелците.
Кај Торонто Кајл Лаури и Демар Дерозан постигнаа по 28 поени. Торонто има скор од седум победи и пет порази.
Мајами загуби од Минесота со 91:103, иако центарот Вајтсајд одигра неверојатен меч во кој го забележа својот прв „трипл дабл“ во кариерата. Вајтсајд мечот го заврши со 22 поени, 14 скокови и 10 блокади. Таунс со 14 поени и исто толку скокови, односно Вигинс со 24 поени ја предводеа Минесота до петтата сезонска победа.
Четвртиот пик од драфтот, Порзигинс имаше учинок од 29 поени и 11 скокови во победата на Њујорк над Шарлот (102:94). Со двоен ефект од 18 поени и 11 скокови натпреварот го заврши Мело Ентони. Кај Шарлот најефикасен беше Вокер кој постигна 31 поен.
Кливленд загуби во Детроит (104:99). Андре Драмонд (25 поени, 18 скокови) и Реџи Џексон (23 поени, 12 асистенции) го предводеа домашниот тим до победата. Кај Кливленд Леброн Џејмс постигна 30 поени, со кои на 19-то место на вечната листа на најдобри стрелци го мина Џери Вест.
Вашингтон забележа убедлив триумф над Милвоки (115:86), Бруклин минимално ја совлада Атланта (90:88), а Денвер победи во Њу Орлеанс со 115:98.
