Први официјални фотографии на обновениот кабриолет „SL“ откри германската автомобилска компанија „Mercedes-Benz“. Јавната премиера на моделот ќе се одржи на претстојниот саем во Лос Анџелес, САД.
Од најраспространетите кадри станува јасно дека моделот добил нова решетка на ладилникот, „LED“ светла во стилот на „AMG-GT“, преден браник со поголеми отвори за воздух, нов дизајн на браникот позади кој има и дифузор, хромирани цевки на издувниот систем и итн.
Кај умерената спортска верзија „SL AMG 63“ се забележува новата предна маска, акценти од карбон по браникот и страничните прагови, како и црни бандажи со гуми „Continental ContiSportContact“. Најмоќниот „SL AMG 65“ доаѓа со акценти во сребрена боја, полирани украси и натписи „V12 BiTurbo“ на предните крила.
Поголеми промени се воведени во внатрешноста на „SL“. Тие се забележуваат со поголемиот централен дисплеј, новиот часовник на таблата со инструменти, елементи од карбон кај „AMG“ верзиите, како и нови контролори за избор на различни режими на возилото, за поставките на суспензијата и за системот „ESP“.
Новините под капакот вклучуваат моќни мотори, автоматски менувач со 9 степени „9G-TRONIC“ и систем кој ја предвидува претстојната кривина.
Конкретни податоци за новините ќе бидат презентирани при премиерата на моделот која е закажана подоцна во овој месец.