Голден Стејт ја забележа десеттата победа од почетокот на сезоната и постави нов рекорд на франшизата. Актуелните шампиони, во ноќта меѓу четвртокот и петок, славеа во дуелот со Минесота (129:116).
Младиот тим на Минесота немаше решение за најдобриот играч во лигата од минатата сезона, Стеф Кари, кој на„волците“ им испорача 46 поени (15/25 од поле, 8/13 за три поени).
Покрај Кари двоцифрени кај Голден Стејт беа уште: Дрејмонд Грин (23 поени, 12 асистенции, 8 скока), Клеј Томпсон (15 поени), Херисон Барнс (14 поени).
Вигинс ја предводеше Минесота со 18 поени, а Таунс оствари „дабл-дабл“ од 17 поени и 11 скокови.
Брендон Најт и Ерик Бледсо блеска во победата на Феникс над ЛА Клиперс (118:114). Најт постигна рекордни во кариерата 37 поени, а Бледсо беше на чекор до „трипл-дабл“, мечот го заврши со 26 поени, 10 скокови, 9 асистенции.
Мајами во неизвесна завршница успеа да слави над Јута (92:91). Двејн Веjд не беше во составот на Мајами, кој во десеттиот меч ја забележа шестата победа. Крис Бош со 25 поени беше најефикасен во тимот од Флорида.
