Главниот дизајнер на концернот „Volkswagen“ – Валтер де Силва, се повлекува од функцијата на крајот на ноември. Веста за неговото заминување беше потврдена и од медиумите во Германија.
Де Силва веќе 9 години го предводеше одделението за развој на дизајнот на автомобилите на групацијата „Volkswagen“. Генерално тој работи во автомобилската индустрија уште од 1972-ра година.
Причината за неговото заминување не е објавена, а според некои извори станува збор за пензионирање – во февруари следната година дизајнерот ќе наполни 65 години, а според други – Италијанецот станува дел од реструктуирањето на концернот поради скандалот со дизел моторите.
Во својата кариера Де Силва има работено за „Fiat“ и „Alfa Romeo“, каде ги создава моделите „156“, „166“ и „147“. Во 2002-ра година се вработил во „SEAT“, па работел на „Ibiza“, „Cordoba“, „Altea“, „Toledo“ и „Leon“. Во „Audi“ е автор на дизајнот на „A6“ (2004), „Q7“ (2005), „R8“ (2006), „ТТ“ (2006), „A5“ (2007) и „A3“ (2003).
Тој исто така ги создаде концептуалните автомобили на „Lamborgini“ – „Miura Concept“ (2006) и „Egoista“ (2013). Од 2008-ма Италијанецот работи и врз модели на „Volkswagen“, а како негови проект се потпишани „CC“ (2008), „Golf“ (2008), „Scirocco“ (2008), „Polo“ (2009), „Amarok“ (2010), „Jetta“ (2010), „Passat“ (2010), „Sharan“ (2010), „Touareg“ (2010), „Beetle“ (2011) и „Up!“ (2011).
Де Силва е уште една поголема фигура, која во рок од 2 месеци го напушта концернот. Поради скандалот со дизел мотори прв си замина извршниот директор Мартин Винтеркорн. Од должноста беа отстранети шефовите на одделенијата за истражување и развој на „Volkswagen“, „Audi“ и „Porsche“ – Хајнц-Јакоб Нојсер, Улрих Хакенберг и Волфганг Хатц.
Си замина и претседателот на „Skoda“ – Винфрид Фаланд. Тој беше назначен за шеф на канцеларијата на „Volkswagen“ во Северна Америка, но само 2 недели потоа си поднесе оставка.
