Први фотографии на модернизираниот семеен модел од „Сee’d“ објави корејската компанија „Kia“. Премиерата на хечбекот и караван верзијата ќе се случи во Франкфурт во септември.
Што се однесува до визуелните промени, тие се прилично минимални. Надворешноста доби нови предни и задни браници, како и дополнителни хромирани елементи. Исто така нови се тркалата со големина од 16 и 17 инчи, кои сега имаат различен дизајн.
Промените во внатрешноста се слични, а се гледаат дополнителни хромирани елементи, како и специјална материја на централната конзола која има заштита од гребење. Подобрувања има во звучната изолација на каросеријата.
Во палетата на мотори на обновениот „Kia Сee’d“ ќе пристигне новиот 1,0-литарски мотор со три цилиндри, кој веќе дебитираше кај верзиите „GT Line“. Агрегатот 1.0 „ecoTurbo“ е достапен во верзии со 100 или 120 КС, а и во двата случаи максималниот вртежен момент е 172 Nm. Бензинската палета ќе ги вклучува и поголемите 1,6-литарски „GDI“ со 128 КС и 1,4-литарски „MPI“ со 100 КС.
Основниот дизел агрегат ќе биде познатиот 1,6-литарски „CRDi“, развива 110 КС. Тој ќе се нуди и во верзија со 136 КС и 285 Нм, кој го заменува актуелната со 128 КС и 265 Нм.
Новина е и автоматската трансмисија со 7 степени и две спојки. Моделот ќе може да се опреми уште со мануелен менувач со 6 брзини и со автоматски менувач со две спојки и 6 степени.
Премиум моделот „Сee’d GT“ исто така ќе добие редизајниран изглед, како и модернизиран мотор. Агрегатот со зафатнина од 1,6 литри ќе добие ново турбо, што ќе овозможи да се редуцира времето за забрзување од 0 до 100 км/час за 0,1 секунди. Моторот е со моќност од 204 КС и максимален вртежен момент од 265 Нм.
Обновениот „Kia Сee’d“ ќе биде достапен на пазарите во Европа уште во следниот месец. Моделот ќе биде дел од штандот на овој производител во Франкфурт.