По 21 месец од стартот на производството од производната лента слезе и последниот, 918-ти „Porsche 918 Spyder“ чија цена во Европа изнесува околу 780.000 eвра.
Наследникот на моделот „Porsche Carrera GT“, прв пат е претставен во јавноста како концепт во март 2010-та на саемот за автомобили во Женева.
Поради тоа што автомобилот наиде на позитивни реакции од страна на публиката и фановите на „Porsche“, германскиот производител продолжи да работи на продукциска верзија која беше готова во 2013-та година.
„Porsche 918 Spyder“ претставува актуелен технолошки „врв“ на компанијата.
За погон е избран хибриден систем кој се состои од 4.6-литарски „V8“ мотор со 608 ks (447 kW) и 530 Nm, како и два електромотори.
Електромоторите произведуваат 156 ks (115 kW) и 129 ks (95 kW), oдносно вкупно 285 „коња“. Максималната комбинирана моќ на хибридниот погон изнесува 887 ks (652 kW).
„Porsche 918 Spyder“ ја мина познатата патека Нирбургринг за неверојатни 6 минути и 57 секунди и постави сериозен предизвик пред конкуренцијата.
Меѓутоа, со оглед дека челниците на патеката најавија дека ќе постават забрана за соборување на рекорди од безбедносни причини, прашање е дали некој од ривалите ќе има можност да го надмине овој резултат.
Иако од „Porsche“ уште на крајот на 2014-та соопштија дека ги распродале планираните 918 примероци, на фабриката и беше потребно уште половина година да ги комплетира и испорача сите нарачани возила.
Шефот на одделението за истражување и развој во „Porsche“, Волфганг Хац, рече дека компанијата треба да ја искористи популарноста на моделот „918 Spyder“ и во иднина да понуди негов наследник.
„Тоа нема да се случи веднаш, но сигурно нема ниту да чекаме 20 години за нов топ модел“, изјави Хац.
