На специјален настан во Лос Анџелес, американската компанија „Saleen“ го претстави моделот „S302 Black Label“. Автомобилот е базиран на новата генерација „Ford Mustang“, а од „Saleen“ тврдат дека ова е најмоќниот производ „Mustang“ на пазарот.
Моделот користи 5.0-литарски „V8“ мотор, помогнат од огромен компресор, програмирано електронско управување и нов систем за вбризгување на горивото со високи перформанси.
Благодарение на доработката моторот генерира 730 КС и 812 Нм, а тоа се показателите при користењето на бензин со октански број 91.
Како и сите производи на „Saleen“, новиот „S302 Black Label“ е опремен со комплетен бодикит кој му придава на моделот уникатен и подинамичен изглед. Автомобилот располага исто така со 20-инчни тркала, заден спојлер и помоќни сопирачки.
Внатрешноста е речиси слична со онаа на стандардниот „Ford Mustang“, но се одликува со тапацир од алкантара, осветлени рачки на вратите и прагови, различни прибор на контролната табла и плакета со индивидуалниот број на автомобилот.
Од „Saleen“ веќе примаат нарачки за новиот „S302 Black Label“, иако се уште не ги објавиле официјалните динамички податоци на моделот. Цените сепак се јасни, а тие почнуваат од 73.214 долари.