Коавторот на култната анимирана телевизиска серија „Симпсонови“, Сем Сајмон, почина по двегодишната борба со ракот на дебелото црево во 60-та година од животот, објави во понеделникот портпаролот на фондацијата којашто го носи неговото име.
Почина Сем Сајмон, коавтор на ‘Симпсонови’
Сем Сајмон, кој ја создаде оваа забавна серија заедно со соработниците Мет Грејнинг и Џејмс Брикс, починал во неделата во својот дом во Лос Анџелес, пишуваат американските медиуми.
„Беше голем човек, се’ нему му должам“, напиша на Twitter неговиот колега и пријател Ал Џин, додавајќи дека неговата прерана смрт претставува „огромна загуба“.
Сајмон инаку ги напушти „Симпсонови“ во 1993 година, но и натаму беше извршен продуцент на серијата, и од нејзиното годишно емитување добиваше околу 10 милиони американски долари. За култната серија доби осум награди Еми, и уште една за соработка на емисијата „The Tracey Ullman Show“.
На Сајмон во 2012 година му беше дијагностициран рак на дебелото црево во терминална фаза, а лекарите тогаш му прогнозираа уште три до шест месеци живот. Оттогаш се посвети на спасувањето на злоставувани животни, но и покрена многу проекти под заеднички назив „Feeding Families“ за помош на сиромашните и бездомниците.
Во интервјуто од 2014 година изјави дека и покрај дијагнозата останува позитивен, бидејќи е опкружен со луѓето коишто го сакаат, се грижат за него и за него се’ би сториле. Рече, исто така, дека тоа е добро чувство и дека го прави среќен и спокоен.
Сајмон дипломирал на престижниот американски универзитет Станфорд. Не се женел и немаше деца, а голем дел од своето богатство проценето на околу 100 милиони долари уште пред смртта ги донираше за борбата за правата на животните.