„Volkswagen“ ја откри новата генерација на моделот „Touran“, чија светска премиера ќе се одржи следната недела во Женева.
Третата генерација на „Touran“ продолжува со познатиот дизајн за „MPV“ возила, но демонстрира поизразена надворешност благодарение на моменти од новиот дизајнерски јазик на „Volkswagen“.
Внатрешноста стана видливо поудобна, а притоа е опремена со најновите инфо-забавни системи на „Volkswagen“, вклучувајќи ги „Android Auto“ на „Google“ и „Car Play“ на „Apple“.
Новиот „Touran“ е изграден на платформата „MQB“, па така е за 13 см. подолг од својот претходник. Меѓуоскиното растојание е зголемено за 11 сантиметри, отворајќи дополнителен простор во внатрешноста, но истовремено вкупната маса на моделот е намалена за 62 кг. Обемот на багажникот е зголемен за 48 литри.
Возилото може да се опреми со 5 или 7 места, нудејќи избор од турбо-бензински и турбо-дизел мотори. Бензинскиот спектар е претставен од 1.2 TSI (110 КС) и 1.4 TSI (150 КС), а дизелот со 1.6 TDI (110 КС) и 2.0 TDI (150 КС или 190 КС).
Премиерата на моделот ќе се одржи во Женева, каде „Volkswagen“ ќе го покаже и обновениот „Sharan“. На пазарот новата генерација „Touran“ ќе биде достапна од почетокот на летото, а првите испораки на клиентите ќе бидат реализирани во текот на втората половина на годината.