Два концептуални автомобили ќе бидат прикажани во почетокот на март од страна на јапонската марка „Suzuki“. Тие ќе дебитираат на автосалонот во Женева и треба да се претворат во предводници на новата гама возила на брендот за пазарите на Стариот континент.
Првиот концепт го носи името „iK-2“ и претставува „идеален компактен автомобил, комбинирајќи хармонија и сила“, се наведува во информацијата од „Suzuki“. Судејќи според фотографијата, можеме да претпоставиме дека станува збор за хечбек од сегмент „С“.
Вториот модел е наречен „iM-4“ и претставува компактен кросовер. Одлуката за формирање на ваков автомобил е повеќе од логична, бидејќи ова се возилата со најголем раст во продажбата во последните години на континентот. Од „Suzuki“ дополнуваат дека овој модел има „уникатна 4х4 ДНК, препознатлив стил и инспиративно однесување на патот“.
Сите детали за двете нови машини на „Suzuki“ ќе бидат познати на 3-ти март во Женева.