Многу намирници се рекламираат како здрави и диетални, а всушност воопшто не се.
Токму поради тоа често слушаме како многу луѓе се жалат дека не можат да ослабат, а за појадок секогаш јадат мусли или овошен јогурт. Погледнете за кои популарни намирници многумина мислат дека се здрави и диетални – а тие се нешто сосема спротивно од тоа.
Вода збогатена со витамини
Ваквите напитоци често се рекламираат како здрав додаток во исхраната бидејќи содржат многу витамини, минерали, па дури и влакна. Меѓутоа, вистината е дека би требало сепак да ги прескокнете и да консумирате обична бода. Всушност, иако на етикетата ќе прочитате дека ваквиот производ содржи многу малку калории, овие напитоци често се прават со вештачки засладувачи кои се подеднакво нездрави како и обичниот шеќер, ако не и полоши. Покрај тоа, тука се често присутни и вештачките ароми и бои.
Овошен јогурт
Комбинација од здрав јогурт полн со пробиотици и свежо овошје – што тука може да биде нездраво? Жените кои се водат по оваа логика често прават голема грешка во исхраната, па купечките овошни јогурти ги консумираат без ограничувања, неретко заменувајќи ги токму со нив вистинските овошни плодови. За жал, вистината е дека во овие јогурти ќе пронајдете само многу прости шеќери и непотребни калории. Многу подобра алтернатива е едноставно да си направите свој, домашен, овошен јогурт во блендер, едноставен – комбинирајте малку јогурт со вашето омилено овошје и додадете по желба малку мед.
Плочки од житарки
Ова е уште една многу популарна „здрава“ ужинка која всушност и не е воопшто добра за вашето здравје. Многу од овие плочки се релативно исти со најобичните чоколади. Често на пакувањето може да се прочита дека се „богати со влакна“ или “одличен извор на протеини“, но никој не е луд на пакувањето да потенцира дека е и „преполно со прости шеќери“. Ако навистина сакате влакна и протеини, за ужинка изберете парче сирење и јаболко.
Намирници со 0% масти
Намирниците без масти се вистинска измама за луѓето кои сакаат да ослабат, бидејќи луѓето најчесто мислат дека „без масти“ значи и „без калории“. Тоа доведува до претерување во консумирањето на вакви намирници. Од друга страна пак, недостатокот на масти произведувачите често го надокнадуваат со додавање на непотребни шеќери – со цел вкусот да биде што подобар. Подобро би било да јадете намирници со масти, но да водите сметка за внесеното количество. Така барем ќе бидете свесни за она што го внесувате во вашиот организам.
Мусли
Поголемиот дел од купечките мусли во само една порција ќе ви дадат огромно количество на транс масти и прости шеќери, кои често се доведуваат во врска со срцевите и мозочните удари. Секако, тоа не важи за сите купечки мусли, затоа е многу важно да обрнете внимание на нутритивната табела на пакувањето. Но, и покрај сето ова, препорачаните порции се толку мали, што луѓето често не се заситуваат и набрзо потоа грицкаат нездрави намирници или јадат уште една порција мусли.
