Дека електричните автомобили не мораат да имаат современ и футуристички дизајн, покажува американското „Renovo Coupe“. Овој автомобил, основан на моделот „Shelby American CSX 9000“, изгледа како да пристигнал од 60-тите години на 20-от век.
Американскиот производител „Renovo Motors“, направи наизглед невозможна комбинација – ретро дизајн и електричен мотор.
Така настана електричниот спортски автомобил кој претставува нешто сосема спротивно од „Tesla S“. Наместо модерен дизајн и футуристичка табла за команди, „Renovo“ потенцијалните купувачи сака да ги привлече со заоблени линии кои биле карактеристични за спортските и тркачките модели од пред половина век.
За погонот е употребен електромотор кој, според фабричките податоци, произведува преку 500Кс и развива повеќе од 1.350Нм максимален вртежен момент.
Тоа е доволно овој автомобил од 0 до 96км/ч (60 милји на час) да забрза за само 3,4 секунди пред да ја достигне максималната брзина од 193км/ч.
Производителот не открил колку автомобилот може да помине со едно полнење на батериите, но навел дека за нивно дополнување потребни се 5 часа на обичен, односно околу 30 минути на брз полнач.
Првиот прототип е претставен во петокот, во Пебл Бич во Калифорнија, а „Renovo“ најавува дека сериското производство ќе започне во 2015 година.
Со оглед на тоа дека компанијата сака да направи 100 примероци кои ќе се продаваат по цена од околу половина милион долари, ексклузивноста е загарантирана.