„Mazda“ ги објави првите фотографии од новата генерација на „двојка“ за јапонскиот пазар која во таа земја ја има ознаката „Demio“.
Автомобилот во голема мера е обликуван по углед на концептот „Hazumi“ кој е претставен на женевскиот авто-саем во март 2014-та.
Двете возила се разликуваат пред се по дизајнот на предниот браник и светлата за магла. Екстравагантните странични ретровизори и се повеќе украсните отколку функционални кваки од концептот го отстапија местото на конвенционалните куќишта на надворешните ретровизори и стандардните кваки на вратите.
Слично е и позади каде што наместо големиот покривен спојлер од „Hazumi“, кој повеќе е погоден за тркачките модели, се наоѓа вообичаен аеродинамичен елемент со врадено трето стоп светло.
Променет е и задниот браник на кој повеќе нема голем дифузор и централно поставена цевка за издувниот систем, овој дел автомобилот е складно обликуван без непотребни и излишни детали.
Неодамна објавивме неофицијални фотографии од ентериерот на новата „Mazdа 2“, па така во тој поглед нема големи изненадувања.
Бројот на копчиња е намален во однос на претходната генерација, а многу функции и команди сега се достапни преку екранот на мултимедијалниот систем, кој како и кај новата „Mazdа 3“ се наоѓа на врвот на централната конзола и форма на голем таблет уред.
Од „тројката“ е превземена и формата на воланот и инструмент таблата.
„Mazda 2“ (Demio) по јапонскиот пазар ќе пристигне и на другите светски пазари. Понудата на мотори ќе зависи од регионот на кој се продава.
Засега се најавени три погонски единици. Новиот 1.5-литарски „SKYACTIV-D“ дизел мотор кој произведува 105 ks (77 kW) и 250 Nm.
Покрај него во понудата ќе се најде и 1.5-литарски „SKYACTIV-G“ бензинец кој ќе биде на располагање со поголема излезна моќ, а се споменува и 1.3-литарски бензински агрегат.
Точните спецификации за европските верзии ќе бидат објавени пред официјалната премиера на парискиот саем за автомобили.
