„Harley-Davidson“ претстави нов мотоцикл, каков што немале во својата досегашна историја. Од него нема да го слушнете познатиот звук на бензинскиот мотор, затоа што го нема, а нема ни резервоар за гориво, ауспух и сите пропратни делови. „LiveWire“ е концептен електричен мотоцикл со кој американската компанија сака да учествува во „обликувањето на следната генерација“ на возачи. Па поради тоа овој мотоцикл не е наменет за продажба.
Како што соопштија од компанијата дометот на „LiveWire“ ќе биде околу 85 километри, а со 74 KS максималната брзина ќе му биде 148 km/h. Неговиот електромотор до „стотка“ ќе забрзува за 4 секунди.
Новинари на „Wired“ го тестираа и велат дека нуди забавен спој на моќ и удобност. Главниот предизвик била промената во дизајнот кој се движел од моторот во дизајнот околу батеријата. Од „Wired“ наведуваат дека батеријата за мотоцикл со вакви карактеристики би требало да биде тешка околу 110 килограми, но инженерите успеале да ја намалат тежината.
„Harley“ ќе го испрати „LiveWire“ на турнеја во своите салони за да можат возачите на класични мотоцикли да го тестираат „нечујниот“ мотор и да го дадат своето мислење. Се претпоставува дека следната година тоа ќе можат да го сторат и возачите во Европа.