„BMW“ за моделот „i8“ изработи нов вид на клуч со дисплеј преку кој корисникот добива важни информации за возењето на овој автомобил со хибриден погон.
Откако производителите воведоа отклучување без класичен клуч и стартување на моторот на копче, неговиот дизајн значително се промени.
Во „BMW“ сфатија дека оваа и натаму неопходна направа, може да послужи за пренесување на подетали информации од патниот компјутер. Па така нивните инженери ги зголемија димензиите на клучот и му вградија екран.
Со оглед дека „BMW i8“ е автомобил со два погонски системи, бензински и електричен, возачот преку екранот може да дознае колку гориво му преостанува во резервоарот, до кое ниво се наполнети батериите и колку километри може да помине пред да остане без бензин, односно електрична енергија.
Компанијата не соопшти дали овој вид на клуч е дел од стандардната опрема на овој автомобил чија цена изнесува преку 100.000 евра или купувачите ќе можат да го добија како дополнителна опција.