Ново истражување покажува дека малите промени во дневните навики можат да имаат големо влијание врз здравјето на срцето. Едно од клучните откритија е таканареченото правило од четири минути, кое се однесува на околу четири и пол минути брзо одење дневно.
Така, истражувачите откриле дека дури и толку кратка активност, со дополнителни 11 минути спиење и внесување на околу 60 грама повеќе зеленчук, може да го намали ризикот од сериозни срцеви заболувања за десет проценти.
Поголемите промени носат поголеми придобивки, па затоа редовниот сон до осум часа, околу 40 минути вежбање и здравата исхрана можат да го намалат ризикот до 57 проценти.
Овие препораки се особено важни за луѓето кои имаат нездрави навики во животот, пишува Дејли Експрес.
Клучот е во комбинирањето на малите промени
Научници од Австралија, Чиле и Бразил анализирале податоци од повеќе од 53.000 возрасни лица на средна возраст.
Во студијата, тие користеле податоци од носиви уреди како што се паметни часовници за да ја следат активноста и нивото на спиење, додека учесниците сами ја пријавиле својата исхрана.
Во текот на осум години, имало 2.034 сериозни кардиоваскуларни настани, вклучувајќи срцеви удари и мозочни удари. Резултатите покажале јасна врска помеѓу дневните навики и ризиците за здравјето на срцето.
Правилото од четири минути може да го намали ризикот од срцев удар: Многу е едноставно
Еден од авторите на студијата, Николас Кемел, ја нагласил важноста на малите промени:
„Комбинирањето на мали промени во неколку области од нашите животи може да има изненадувачки големо позитивно влијание врз нашето кардиоваскуларно здравје“, рече тој.
Слична порака испрати и Емили Мекграт од Британската фондација за срце, која истакнува дека клучот лежи во одржливите навики.
Здравата исхрана, престанокот со пушење и контролата на крвниот притисок се сè уште камен-темелници на превенцијата од срцеви заболувања.
