Сопствениците на електрични автомобили се запознаени со „правилото од 80%“ кога станува збор за полнење на нивните батерии. Причината за ова е едноставна, полнењето до максимум не е секогаш најдобро за батеријата, а исто така трае и подолго.
Пред сѐ, долгорочното здравје на батеријата може да страда ако постојано се полни до 100%. Честото држење на батеријата на нејзиниот максимален капацитет може да го забрза нејзиното влошување.
Дополнително, брзината на полнење значително паѓа откако батеријата ќе достигне околу 80%.
За разлика од полнењето гориво, батериите не се полнат со стабилна брзина, колку повеќе се полнат, толку побавно добиваат енергија.
Тест спроведен од „EV Pulse“ на „Hyundai Ioniq 5“ покажа дека батерија од 77,4 kWh може да се наполни од 10 до 80% за само 18 минути на полнач од 350 kW.
Сепак, преостанатите 20% траеја дополнителни 30 минути.
Не сите батерии се создадени еднакви
Современите електрични возила користат три главни типа батерии: „LFP“ (литиум железо фосфат), „NMC“ (никел манган кобалт) и „NCA“ (никел кобалт алуминиум).
„LFP“ батериите се подобри во справувањето со полнење до 100%, особено на пониски или умерени температури. Сепак, на високи температури, се препорачува да се одржуваат околу 80% за да се продолжи нивниот век на траење.
Студија објавена во 2023-та година во списанието „Frontiers“ откри дека капацитетот на литиумските батерии може значително побрзо да се намали кога се изложени на температури над 45 °C и во висока состојба на полнење.
Батериите „NMC“ и „NCA“, како оние што се користат во модели како „Hyundai Ioniq 5“ или „Tesla Model S“, се почувствителни на често полнење од 100%.
Оптимално е полнењето да се одржува помеѓу 80 и 90%, особено во потоплите клими.
Кога да се полни до 100%?
Повременото полнење до 100% нема значително да ја оштети батеријата. За „LFP“ батерии, се препорачува дури и едно целосно полнење неделно за правилно калибрирање.
За „NMC“ и „NCA“ батериите, ова е доволно еднаш месечно или двапати, така што системот за управување со батериите (BMS) може прецизно да ги балансира ќелиите.
Заклучокот е јасен: правилото од 80% сè уште има смисла.
Ова го намалува времето поминато на полначот, ја зголемува ефикасноста и ја зачувува батеријата на вашиот електричен автомобил на долг рок.
