„Commerzbank“ планира да започне нова програма за откуп на акции во вредност од 540 милиони евра откако годишната добивка ги надмина проценките на аналитичарите.
Програмата за откуп ќе започне оваа недела и ќе биде дополнување на дивидендата од 1,10 евра по акција што заемодавателот со седиште во Франкфурт планира да им ја понуди на акционерите, според соопштението во вторник. Аналитичарите очекуваа 1 евро по акција.
Нето добивката за целата година, исто така, беше поголема од очекуваната, со 2,63 милијарди евра, во споредба со прогнозата од 2,52 милијарди евра во анкетата на „Bloomberg“ меѓу аналитичарите.
Плаќањата се дел од ветувањето на извршната директорка Бетина Орлоп да ги врати сите профити на инвеститорите додека се обидува да го заштити заемодавателот од несаканото внимание на италијанскиот конкурент „UniCredit“. Додека позитивното влијание на повисоките каматни стапки што ѝ помогнаа на „Commerzbank“ да се опорави постепено бледнее, се очекува планот на Германија за зголемување на трошоците за одбрана и инфраструктура да ѝ помогне на банката оваа година.
Акциите на банката продолжија да растат, зголемувајќи се за 1,8 проценти во Франкфурт, бришејќи го падот од оваа година. Акциите имаат повеќе од двојно зголемена вредност во текот на изминатата година.
Зголемената проценка, во комбинација со противењето на германската влада на преземањето, ја натера „UniCredit“ да ја одложи својата одлука дали да продолжи со понудата за преземање. „UniCredit“ поседува околу 29 проценти од „Commerzbank“, што ја прави најголем инвеститор во банката. Германската влада поседува повеќе од 12 проценти.
Дел од стратегијата на Орлоп е да ја подобри профитабилноста преку забрзување на намалувањето на трошоците и затворањето на филијалите. Ваквите трошоци за реструктуирање влијаеја на профитот минатата година, стеснувајќи го во однос на претходната година. Без влијанието, нето добивката би се зголемила за 13 проценти на рекордни 3 милијарди евра, соопшти „Commerzbank“.
Одделно, заемодавателот соопшти дека главниот директор за ризик Бернд Шпелт ќе се повлече од лични причини кога ќе му истече договорот на крајот од 2026-та година. „Commerzbank“ започнува потрага по наследник.
„Бернд не е само извонреден главен директор за управување со ризици, туку и високо ценет колега. Ја почитувам неговата одлука, но во исто време многу ми е жал и му посакувам се најдобро во иднина“, рече Орлоп во соопштението.
