Официјално е претставен електричниот „Renault Twingo“, мал електричен градски автомобил кој ќе чини помалку од 20.000 евра.
Како градски електричен автомобил, „Twingo“ не импресионира особено со спецификациите на погонскиот склоп – има батерија од 27,5 kWh и мотор од 80 ks, кој овозможува опсег од 263 километри и поддршка за полнење со моќност од 50 kW.
Скромен, но сосема доволен за возило наменето за секојдневно градско возење.
Внатрешноста носи 7-инчна дигитална инструмент табла и 10-инчен централен мултимедијален екран, со физички кратенки до најважните функции.
Назад има место за две лица, а благодарение на четирите врати и лизгачките задни седишта, волуменот на багажникот може да достигне 360 литри, со дополнителни прегради за складирање.
Моделот ќе биде достапен во две нивоа на опременост.
Основното ниво на опременост, наречено „Evolution“, нуди „Android Auto“ и „Apple CarPlay“, пресликување на екранот на телефонот, темпомат, автоматско сопирање во итни случаи, рачен клима уред и задни сензори за паркирање.
Повисокото ниво на опременост, „Techno“, го носи инфозабавниот систем „Google“, адаптивен темпомат, автоматски клима уред, електрични ретровизори, камера за движење наназад и автоматски бришачи.
