„BMW Speedtop“, ултраограничениот модел од специјално издание базиран на „Series 8“, беше претставен во мај годинава на престижниот настан во Вила д’Есте.
Иако формално беше претставен како концепт, германскиот производител планира да произведе само 70 примероци од овој „shooting brake“. Сите беа веднаш резервирани, потврди извршниот директор на „BMW“, Оливер Ципсе.
За време на конференциски повик со инвеститори, на кој се сумираше работењето во првата половина од 2025-та година, Ципсе изјави дека „Speedtop“ се распродал веднаш по премиерата на езерото Комо, пренесува „BMW Blog“.
Иако цената не е официјално објавена, Ципсе нагласи дека станува збор за „ценовен опсег од највисока класа, на ниво што досега не е достигнато“.
Според неофицијални информации објавени од „BMW Blog“, цената на „Speedtop“ изнесува околу 500.000 долари.
Овој ексклузивен модел е базиран на купе-верзијата на „Series 8“, но добива специфични панели на каросеријата, продолжен покрив во стилот на караван и заден дел инспириран од хечбек-дизајнот.
Под хаубата, според „BMW“, се наоѓа „најмоќниот V8 мотор“ што моментално го нуди брендот. Иако нема официјални технички спецификации, логично е да се претпостави дека се работи за 4,4-литарски V8 со двоен турбополнач, преземен од „BMW M8“, кој испорачува 625 коњски сили и 750 Nm вртежен момент. Моќноста се пренесува на сите четири тркала преку осумстепен автоматски менувач.
„Speedtop“ е вториот специјален проект базиран на „Series 8“ што „BMW“ го претстави во Вила д’Есте. Минатата година дебитираше моделот „Skytop“ – купе со две седишта, тарга покрив и слични дизајнерски детали. За „Skytop“ се најавени само 50 произведени примероци, што значи дека „Speedtop“ ќе биде нешто „почест“ модел на патиштата.
Со растечката побарувачка за ексклузивни модели со ограничено производство, очигледно е дека „BMW“ ја пронајде својата ниша токму преку претставувањето на вакви возила на луксузни настани како Вила д’Есте.
И ова можеби е само почеток. Од компанијата за „BMW Blog“ веќе најавија дека внатрешниот тим за мали серии има резервирана позиција за „BMW M“, што најавува дека во наредните години може да очекуваме уште поекстремни модели.
