Производителот на чипови „Micron Technology Inc.“ ќе потроши околу 200 милијарди долари за производство, истражување и развој во САД, станувајќи најновата компанија што се обврза на големи инвестиции во земјата откако претседателот Доналд Трамп победи на ноемвриските избори.
Трошењето ќе вклучува околу 150 милијарди долари за нов локален производствен капацитет и уште 50 милијарди долари за истражување и развој, соопшти „Micron“. Вкупниот износ е зголемување од 30 милијарди долари во однос на оригиналниот план.
Администрацијата на Трамп им даде приоритет на компаниите што преземаат инвестициски обврски во Соединетите Држави како дел од поширокиот напор за стимулирање на економијата и зајакнување на нејзината производствена база. „Apple Inc.“, „Microsoft Corp.“ и „Taiwan Semiconductor Manufacturing Co.“ јавно изјавија дека ќе ги зголемат своите инвестиции во американската економија.
Минатата недела, министерот за трговија Хауард Лутник изјави дека САД ги ревидираат договорите што ги постигнале со полупроводничките компании според Законот за чипови од 2022-ра година за да обезбедат, како што ги нарече, подобри услови.
Се очекува „Micron“ да добие околу 6 милијарди долари преку законот за изградба на домашен производствен капацитет.
Во некои случаи, федералната влада се вклучува во проекти што веќе се започнати или чие завршување ќе трае многу години. Јапонската „SoftBank Group Corp.“ и „OpenAI“ најавија можен потфат за вештачка интелигенција вреден 500 милијарди долари, но напредокот во тие инвестиции е бавен.
Во случајот на „Micron“, компанијата претходно вети дека ќе инвестира околу 125 милијарди долари за изградба на фабрики во САД, иако минатата година почна да ги забавува некои од своите планови.
„Micron“ сега вели дека инвестицијата треба да создаде околу 90.000 директни и индиректни работни места. Дополнителните 30 милијарди долари, односно 1,1 милијарда долари, ќе бидат искористени за голем број проекти, вклучувајќи изградба на фабрика во Ајдахо и надградба на постоечки објект во Вирџинија.
Временската рамка за целокупниот инвестициски план на „Micron“ е нејасна. Во последниве години, компанијата потрошила помеѓу 7 и 12,5 милијарди долари за годишни капитални расходи.
