Новак Ѓоковиќ триумфираше на Мастерсот во Лондон откако синоќа во финалето во „О2 Арената“ го победи Рафаел Надал.
Мечот во два сета за 96 минути со 2-0 го доби српскиот тенисер што за него беше 22.ра победа во серија и воедно успеа да ја одбрани титулата освоена лани на истиот турнир.
За Ѓоковиќ ова е трета победа на завршниот Мастерс турнир во своето трето финале, додека Надал и во вториот финален меч остана без трофеј. Србинот претходно победи и во 2008 и 2012 година.
Првиот сет Ѓоковиќ го доби со 6:3 во гемови и притоа имаше два брејка, а Надал еден. Во вториот сет беше 6:4 за Ѓоковиќ, кој направи еден брејк и ја искористи третата меч топка.
Во меѓусебните дуели скорот сега е 22:17 за Надал, а во 2013 година 5:4 за Шпанецот.
За Ѓоковиќ ова беше 41.ва титула или седма во 2013 година.
И покрај поразот во финалето Надал 2013 година ќе ја заврши како број1, а Ѓоковиќ е број 2 на светската АТП ранг листа.
Во игра на двојки победија Шпанците Фернандо Вердаско и Давид Мареро, кои беа подобри од Американците браќата Боб и Мајк Брајан. з
