Германскиот железнички оператор „Deutsche Bahn“ плати речиси 197 милиони евра како компензација за доцнење и откажување на возови во 2024-та година, објави компанијата, цитирана од ДПА.
Во текот на годината беа поднесени околу 6,9 милиони барања. За споредба, во 2023-та како резултат на 5,6 милиони побарувања, платен е надомест од вкупно 132,8 милиони евра.
„Ако возот доцни и нашите патници имаат право на компензација, ние го плаќаме без спор“, велат од компанијата.
Според „Deutsche Bahn“, 80 отсто од доцнењата се поради застарена и преоптоварена инфраструктура.
Над една третина од железничките услуги на долги релации не биле на време минатата година, со 37,5 отсто од возовите кои доцнеле повеќе од 5:59 минути. Ова е најлошиот индикатор за точност за германската железничка мрежа во најмалку 21 година.
Портпаролот на компанијата ја истакна и тековната реновирана работа. До 2030-та година „Deutsche Bahn“ планира целосно реновирање на 41 железнички коридор со густ сообраќај.
„Deutsche Bahn“ има за цел да ја зголеми точноста на експресните возови на долги релации на 75-80 проценти до крајот на 2027-ма година, рече портпаролот.
