Кинеската централна банка испумпа речиси историски износ на краткорочни средства во својот финансиски систем, зголемувајќи ја поддршката за ликвидност во услови на недостиг на готовина како што се приближуваат лунарните новогодишни празници, објави „Bloomberg“.
Монетарната власт инјектираше нето 958,4 милијарди јуани (околу 126,7 милијарди евра) готовина преку седумдневни обратни репо-трансакции во дневните операции на отворен пазар. Ова е втор најголем ваков потег, според податоците собрани од „Bloomberg“ од 2004-та година на овој начин.
Операцијата има за цел да го неутрализира влијанието на истекот на среднорочното кредитирање, шпицот на даночната сезона и побарувачката за готовина пред кинеските новогодишни празници, како и да одржи доволна ликвидност во банкарскиот систем, соопшти регулаторот во изјава.
Значајната поддршка за ликвидност ќе биде олеснување за кинеските заемодавци, откако кризата во готовина претходно оваа недела доведе до зголемени седумдневни меѓубанкарски стапки на заеми на нивните највисоки нивоа за повеќе од една година. Претходно, зголемената решеност на кинеската централна банка да го брани јуанот под притисок предизвика загриженост дека тој може да биде ограничен во обезбедувањето доволна ликвидност на економијата.
Финансиската институција во последните месеци се оддалечува од т.н повеќегодишното финансирање и нејзината каматна стапка како главен инструмент на нејзината монетарна политика, префрлајќи наместо тоа на седумдневната обратна репо стапка за да ги насочи пазарните трошоци за задолжување.
Централната банка користи и мерки за ликвидност за да ја прошири својата поддршка за јуанот, кој е под притисок од поскапувањето на доларот. Во петокот продаде рекордни 60 милијарди јуани во шестмесечни обврзници во Хонг Конг – потег што ќе доведе до одлив на ликвидност во странство за поддршка на побарувачката за валутата.
Во Кина, монетарната власт ќе користи монетарни инструменти како што се каматните стапки и коефициентот на задолжителна резерва за да одржи доволна ликвидност.
Сезонската побарувачка за готовина се очекува дополнително да се зголеми во пресрет на еднонеделниот одмор, кој оваа година започнува на 28-ми јануари. Кинеските жители обично повлекуваат повеќе готовина од банките за да се подготват за зголемено трошење и традиционално подарување.
