На големо се шпекулираше дека Чичарито би можел во јануари да си замине од „Олд Трафорд“, но изгледа дека конечно му се наметна на тренерот.
Хавиер Ернандез беше „џокерот“ на Фергусон.
Легендарниот стратег успешно ги користеше квалитетите на Мексиканецот, кој редовно му се оддолжуваше со голови и тоа честопати во клучните моменти од средбите.
Сепак, на стартот од сезоната под водство на Девјид Мојс, популарниот Чичарито не беше во првиот план, а шанса за настап не ни добиваше.
Во медиумите се појавија информации дека тој би можел да се пресели во Тотенхем или во редовите на Валенсија, а и самиот Чичарито преку Твитер навестуваше дека размислува за заминување.
Но, Дејвид Мојс најверојатно ја затвора вратата за потенцијалното заминување.
Чичарито постигна 4 гола во оваа сезона. Тој не настапи на последниот натпревар против Фулам, но го постигна победоносниот и единствен гол во Лига Купот против Ливерпул, како и одлучувачкиот погодок против Стоук во првенствената победа од 3:2.
Новиот Шкот на клупата на Јунајтед, најверојатно ја разбра пораката.
„Чичарито постигна многу голови во текот на последниве години во клубот. Потребен ни е, а тој е многу добар играч за овој тим“, кратко изјави Дејвид Мојс.
