Дури и под санкции, Русија купила долари и евра во вредност од 2,3 милијарди долари, според податоците од февруари 2022-ра година до декември 2023-та година до кои има пристап „Reuters“. САД и ЕУ го забранија извозот на готовина во Русија во март 2022-ра година, кога започна целосната војна во Украина.
Документите покажуваат и уште еден интересен тренд – многу нагло зголемување на купувањето девизи од Русија непосредно пред Москва да нареди инвазија на Украина – во периодот од ноември 2021-ва до февруари 2022-ра година биле увезени банкноти од долари и евра во вредност од 18,9 милијарди долари. Во претходните четири месеци увозот бил вреден само 17 милиони долари.
Сега под санкции, банкнотите се испорачуваат во Русија преку земји како Обединетите Арапски Емирати (ОАЕ) и Турција, кои се противат на западните санкции против Русија. Околу 25% од овие банкноти се увезени од банките – податоците од царината и изворите на „Reuters“ потврдуваат дека банките примиле 580 милиони долари во готовина од странство наспроти количества благородни метали со иста вредност помеѓу март 2022-ра година и декември 2023-та година.
Податоците од мониторингот на рускиот девизен пазар покажуваат дека кинескиот јуан е најтргувана валута во Москва. Трговијата меѓу Кина и Русија треба да достигне 240 милијарди долари во 2023-та година, а во последниве месеци плаќањата меѓу двете земји беа попречени поради заканата од секундарни санкции, а трансакциите вообичаено се одвиваат преку мали регионални кинески банки кои се потешки за следење од Западот.
За Русија доларот и еврото станаа „токсични“ откако Западот ги исклучи руските банки од меѓународниот финансиски систем, обидувајќи се да ги ограничи трговските можности, чии средства се користат за финансирање на војната во Украина. Речиси 300 милијарди долари средства на руската централна банка се блокирани од западните институции поради инвазијата на соседната земја.
Но, за обичните Руси доларот е сепак најсигурната валута, коментира Дмитриј Полевој, шеф на руската инвестициска компанија „Астра Асет Менаџмент“. Тој додава дека луѓето сѐ уште бараат готовина при патување во странство, како и заштеда.
Централната банка на Русија го забрани извозот на девизи во обид да ја стабилизира рубљата. Овие мерки дадоа резултати и податоците покажуваат дека само 98 милиони долари и евра „заминале“ од земјава од февруари 2022-ра година до крајот на 2023-та година.
Истовремено, приливите се значително поголеми. Речиси сите се преку малку позната компанија – „Аеро-Трејд“, која пријавила 73 пратки, секоја за банкноти во вредност од 20 милиони долари или вкупно 1,5 милијарди долари. Сите поминале низ аеродромот Домодедово. Испораките се опишани како приходи од размена или трговија во авионот. „Reuters“ соопшти дека не може да ги идентификува клиентите на компанијата и изворот и локацијата на готовината што е пријавена, врз основа на материјалите што ги поседува.
Сопственик на компанијата е Артјом Мартињук. Тој изјави за „Reuters“ дека се сомнева во автентичноста на царинските податоци, но одби да коментира дополнително за ова прашање.
