Уште два легендарни модели заминуваат во историјата

На почетокот на оваа година се појавија гласини дека „BMW“ планира да го прекине производството на моделот „Z4“ по завршувањето на животниот циклус на актуелната генерација. Овие тврдења сега се потврдени од „Automobilwoche“, кој известува дека „BMW Z4“ и „Toyota Supra“ ќе излезат од производната лента во 2026-та година.

Самата вест за суспензијата на двата модели првично остана незабележана, бидејќи главната информација беше за проблемите што ги доживува фабриката Магна Штајр во Австрија. Таму се произведуваат двата спортски автомобили. Сепак, компанијата ќе мора да укине најмалку 500 работни места поради прекинот на производството на неколку модели, вклучувајќи ги „BMW 5-Series“, „Jaguar E-Pace“ и „I-Pace“, како и „Fisker Ocean“.

Засега „Toyota“ одбива да коментира за иднината на „Supra“, бидејќи претставник на производителот изјави само дека соработката со „BMW“ била успешна и компанијата размислува за опција за во иднина. Тоа веројатно значи дека „Toyota“ може сама да го продолжи производството на „Supra“, иако тешко дека тоа ќе биде економски оправдано.

Факт е дека продажбата и на „Supra“ и на „BMW Z4“ опаѓа, а завршувањето на нивното производство во 2026-та година е сосема логичен чекор.