Речиси целиот руски извоз на нафта оваа година отиде во Кина и Индија, изјави во средата вицепремиерот Александар Новак, додека Москва одговори на економските санкции од Западот со брзо пренасочување на испораките од Европа.
Русија, пишува „Reuters“, успешно ги заобиколи санкциите за нејзината нафта и ги пренасочи тековите од Европа кон Кина и Индија. Заедно, тие сочинуваат околу 90 отсто од рускиот извоз на сурова нафта, изјави Новак, кој е одговорен за енергетскиот сектор во земјата.
Тој додаде дека Русија почнала да воспоставува врски со азиско-пацифичките земји уште пред Западот да воведе санкции кон Москва по почетокот на конфликтот во Украина во февруари 2022-ра година.
„Што се однесува до овие ограничувања и ембарга за испораките на Европа и САД што беа воведени, ова само го забрза процесот на преориентирање на нашите енергетски текови“, рече Новак, откривајќи и дека европскиот удел во извозот на руска сурова нафта е намален од околу 40- 45% до само околу 4-5%.
„Главни партнери во сегашната ситуација се Кина, чиј удел порасна на околу 45-50%, и, се разбира, Индија. Претходно практично немаше испораки за Индија, а за две години вкупниот удел на залихи до таму достигна 40 отсто“, нагласи Новак.
Говорејќи за групата водечки производители на нафта ОПЕК +, Новак рече дека Русија се држи до своите обврски за намалување на испораките и дека ја гледа цената на нафтата од типот Брент на ниво од 80-85 долари за барел следната година, што е во голема мера во согласност со сегашните нивоа.
Минатиот месец, САД најавија и санкции против проектот за течен природен гас „Арктик ЛНГ 2“ предводен од руската компанија „Новатек“. Акционерите во страв од реакција од санкциите го прекинаа учеството во проектот, откажувајќи се од одговорноста за финансирањето и договорите за откуп на производството од фабриката, пишува во понеделникот весникот „Комерсант“.
Предметните санкции, исто така, доведоа до тоа Новатек да прогласи виша сила за снабдувањето со ЛНГ од проектот, изјавија извори од индустријата за „Reuters“.
Новак објаснува дека проектот практично веќе започнал со производство на течен природен гас, а првите испораки се очекуваат во првиот квартал на 2024-та година.
Извори од индустријата потврдуваат дека ги произвела „првите капки“ ЛНГ, но ќе помине уште некое време пред да го достигне номиналниот капацитет од 6,6 милиони метрички тони годишно.
Кина остро ги критикуваше санкциите на Вашингтон против проектот.
