По „R4“ и „R5“, „Renault“ враќа во живот уште еден легендарен модел од богатата историја на француската марка.
„Renault“ го откри серискиот прототип на новиот „Twingo“, кој треба да се појави во продажба во 2026-та година. Ќе биде целосно електричен модел, а од изгледот на прототипот, надворешниот дизајн е инспириран од оригиналниот модел од 1990-тите.
Затоа, изгледот на овој прототип е сосема поинаков од моделот во заминување, кој имаше типична корпоративна предна табла на „Renault“ и специфичен заден дизајн со мотор поставен позади и погон на задните тркала.
Прототипот ја дели формата на надворешноста со првата генерација на „Twingо“, додека предниот дел е модерна интерпретација на оригиналниот модел со препознатлив дизајн на фаровите. Новиот автомобил ги има дури и карактеристичните тројни отвори на хаубата, но овде тие се далеку поизразени и штрчат од каросеријата, додека нивната функција е само естетска.
„Renault“ допрва треба да ги објави спецификациите на идното сериско „Twingo“, но веќе ветува неверојатна ефикасност од 10 kWh/100 km. Ова ќе го направи најефикасното електрично возило во својата класа.
Во палетата на француската марка, новото „Twingo“ ќе седи под идниот електричен хечбек „Renault 5“ и електричниот компактен теренец „Renault 4“, користејќи ја истата модуларна механичка платформа „AmpR Small“.
Дизајнот, инженерството и производството ќе бидат одговорност на новооснованата марка „Ampere“, наменета исклучиво за електрични возила на групацијата „Renault“.
Од „Renault“ тврдат дека новото „Twingo“ ќе има почетна цена „под 20.000 евра“. Посебно примамлива почетна цена имајќи предвид дека повеќето електромобили што се продаваат денес се прескапи за просечниот клиент да си ги дозволи.
Таа комбинација на атрактивен дизајн, импресивна ефикасност и достапност може да го направи овој модел бестселер меѓу електричните модели во Европа.
