За да се одбележат две децении на „Golf R“, во 2022-ра година, „Volkswagen“ лансираше скапо јубилејно издание на овој „hot hatch“ автомобил со погон на сите тркала. На купувачите им беше достапен по цена од 59.995 евра.
Речиси истиот автомобил беше повторно лансиран претходно оваа година како „Golf R 333“ со огромен скок на цената бидејќи сега чинеше 76.410 евра! И покрај астрономската сума, сите 333 единици беа продадени за само осум минути.
И додека „20 Years Edition“ се нудеше во неколку земји покрај Германија, овој „R 333“ беше ексклузивен за германскиот пазар. Не само што е најскапиот (производен) голф во историјата, туку беше и поскап од технички супериорниот „Audi RS3“ со помоќен внатрешен 5-цилиндричен мотор. „Golf R 333“ имаше приближно иста цена како „Porsche 718 Cayman S“!
Група купувачи беа поканети во седиштето на „Volkswagen“ во Волфсбург за да ги земат своите скапи автомобили, каде што ги чекаа повеќе од 20 примероци на „Golf R 333“ со идентични спецификации, обоени во варово-жолта металик.
Сите автомобили имаат 19-инчни црни „Estoril“ тркала, „Akrapovič“ четири издувни цевки за гасови и „DSG“ менувач. Под хаубата се наоѓа 2.0-литарски турбо-бензинец со 333 ks (оттука и името на автомобилот) и 420 Nm.
Ова е доволно за да се забрза до 100 km/h за 4,6 секунди и да достигне максимални 270 km/h, по исклучувањето на електронскиот ограничувач.
