„Zoom Video Communications“ објави профит во третиот квартал кој ги надмина проценките на Вол Стрит, што е позитивен знак дека компанијата се обидува да се справи со постпандемиското забавување на бизнисот нудејќи широк спектар на алатки за соработка.
Цената на акцијата на платформата за видео конференции порасна за речиси 4% во после-пазарното тргување.
Платформите за видео конференции, вклучувајќи ги „Zoom“, „Тeams“ на „Microsoft“ и „Webex“ на „Cisco“, станаа едни од најкористените за време на пандемијата, бидејќи компаниите и поединците се обратија кон нив за да се поврзат со вработените и пријателите.
Компанијата со седиште во Сан Хозе, Калифорнија очекува прилагодена заработка по акција помеѓу 1,07 и 1,09 долари за третиот квартал. Тоа беше над просечната проценка на аналитичарите од 1,03 долари по акција, покажаа податоците на „Refinitiv“.
„Zoom“ очекува неговиот приход во третиот квартал да биде помеѓу 1,115 и 1,20 милијарди долари за кварталот, во споредба со просечната проценка на аналитичарите од 1,13 милијарди долари.
„Постојат голем број нови производи, од кои ниту еден не се чини дека е главен придонесувач за растот на приходите во оваа фаза“, рече аналитичарот на „Needham and Co“, Рајан Кунц.
Приходите за кварталот што заврши на 31-ви јули се зголемија за 3,6% на 1,14 милијарди долари, надминувајќи ја просечната проценка на аналитичарите од 1,12 милијарди долари.
Со исклучок на одредени ставки, компанијата објави заработка од 1,34 долари по акција наспроти проценката од 1,05 долари по акција.
Корпоративните приходи се зголемија за 10,2% на 659,5 милиони долари. Компанијата додаде околу 218 илјади корпоративни клиенти – зголемување од 6,9% во споредба со претходната година.
„Нашата прогноза за зголемени вкупни приходи го одразува нашиот континуиран поглед на корпоративниот сегмент“, рече главниот финансиски директор Кели Стекелберг.
„Zoom“ ја зголеми својата годишна прогноза за приходи меѓу 4,49 и 4,50 милијарди долари. Претходно очекуваше 4,47 до 4,49 милијарди долари.
Компанијата, исто така, ја зголеми својата прогноза за годишна приспособена заработка на 4,63 до 4,67 долари по акција, од 4,25 на 4,31 долари по акција порано.
